Biblioteca de libros digitais

Aquí tedes o enlace dunha biblioteca de libros dixitais infantís e xuvenís portuguesa. Non deixedes de entrar e ler algúns destes libros, moi fermosos, e que sacan o máximo rendimento ás novas tecnoloxías. En verdade paga a pena facerlle unha visita.

Outra xentileza de Azu.

Dúas obras imprescindibles sobre lectura literaria na escola

Xa estamos de volta, despois dun verán que se resiste a deixarnos. Pero xa é tempo de voltar a lecturas máis reflexivas.

Esta fin de semana tivemos a oportunidade de escoitar nas Xornadas de bibliotecas escolares a Guadalupe Jover. Escoitala foi unha experiencia extraordinaria. Eu diría que fala "como un libro aberto" e ademais comunica o seu entusiamo pola lectura literaria. Escoitar a Guadalupe incitoume a reler o seu libro Un mundo por leer e a recomendar a súa lectura. Pero ademais é imposible non ligala á Teresa Colomer e a súa obra Andar entre libros.

Ambas enfróntanse a unha serie de cuestións fundamentais ¿Por que ler na escola? ¿Para que serve? E ambas por camiños diferentes e con reflexións ben fundamentadas inciden na importancia de ler literatura para ler o mundo, para comprendelo mellor.

Creo que son dous libros de cabeceira que nos axudan a dar sentido ao noso traballo. Os dous son excelentes e eu diría que de lectura obrigada.

Relatos de lo inesperado

Para iniciar esta sección, e seguindo con Roald Dahl, vou suxerirvos una lectura para estas vacacións: Relatos de lo inesperado, que estou segura de que non vos defraudará se decidides lelo. Son relatos breves, cheos de intelixencia e ironía, que permiten unha lectura relaxada, pracenteira e tamén unha reflexión sobre moitos aspectos sociais e humanos. Non quero adiantarvos máis nada. ¡Xa me contaredes!